Via Crucis
Pitturi ta’ Sieger Köder
Ċentru Spiritwalità Injazjana
1. Ġesù kkundannat għall-mewt
Ġw 19, 5-6
-
“Arawh, hawn hu l-bniedem!” - Ġesù xbiha tal-bniedem
-
Il-kruha tad-dnub
-
Il-ġmiel bla tarf tal-imħabba ta’ Alla
Nitolbu: Ġesù, int il-vera xbiha tal-bniedem. Agħmel li nħarsu lejk biex insiru nafu min aħna. Għallimna wkoll nagħrfu dak li jtebba’ dix-xbiha u li ninfetħu iktar għall-ġmiel ta’ mħabbtek.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
U Ġesù ħareġ hemm barra, liebes il-kuruna tax-xewk u l-mantar aħmar; u Pilatu qalilhom: “Arawh, hawn hu l-bniedem!”
X’ħin rawh, il-qassisin il-kbar u l-għases bdew jgħajjtu u jgħidu: “Sallbu! Sallbu!” Pilatu qalilhom: “Ħuduh u sallbuh intom; jiena ma nsib ebda ħtija fih.”
2. Ġesù mgħobbi s-salib
Ġw 19, 17-18
-
L-għażla tal-imħabba ssir konkreta - is-salib
-
Is-salib hu l-prezz tal-imħabba
-
Aħna mistednin biex inħobbu, biex nerfgħu salibna
Nitolbu: Ġesù, l-imħabba tiegħek mhix bil-kliem biss. Kont lest li tħallas prezz għoli. Għinna naslu biex insofru għax inħobbu.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Ġesù rafa’ s-salib u ħareġ lejn il-post imsejjaħ ‘il-Qorriegħa’, bil-Lhudi Golgota.
Hemm huma sallbuh ma’ tnejn oħra, wieħed kull naħa, u Ġesù fin-nofs.
3. Ġesù jaqa’ l-ewwel darba
Is 53:5-6
-
Għax iħobb Ġesù jieħu fuqu l-piż tal-ħażen tagħna
-
Il-ġustizzja ta’ Alla murija b’mod sorprendenti
Nitolbu: Ġesù, int urejtna ġustizzja differenti minn dik tagħna. Għinna nfittxu l-ġustizzja filwaqt li nħennu.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
5 Iżda hu kien miġruħ minħabba fi dnubietna,
misħuq minħabba fi ħżunitna.
Għas-saħħa tagħna waqa’ l-kastig fuqu,
u bis-swat tiegħu sibna l-fejqan tagħna.
6 Aħna lkoll bħal nagħaġ mitlufa,
kull wieħed minna qabad triq għal rasu.
U l-Mulej xeħet fuqu l-ħażen tagħna lkoll.
4. Ġesù jiltaqa’ ma’ ommu
Lq 2:34-35.51
-
L-ewwel dixxiplu tiegħu tibqa’ miegħu sal-aħħar
-
Iżżomm f’qalbha dawn il-ħwejjeġ kollha
-
Tħallihom jagħtuha l-ħajja
Nitolbu: Marija, int d-dar mibnija fuq il-blat għax bqajt ma’ Ibnek sal-aħħar. Għinna ma ngħotrux quddiem l-isfidi tal-Għadu.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
“Ara, dan se jġib il-waqgħa u l-qawmien ta’ ħafna f’Iżrael; se jkun sinjal li jmeruh, - u inti wkoll, sejf jinfidlek ruħek! - biex jinkixfu l-ħsibijiet moħbija fil-qlub ta’ ħafna.”
U ommu kienet tgħożż f’qalbha dawn il-ħwejjeġ kollha.
5. Ġesù mgħejjun miċ-Ċirinew
Mk 15:21
-
Hu mġiegħel, aħna mistiedna
-
Nissieħbu miegħu
-
Fil-mixja lejn il-ġustizzja, lejn is-saltna
Nitolbu: Ġesù, int tistedinna naħdmu u nsofru miegħek fit-tfittxija tal-paċi, l-ġustizzja u l-imħabba. Agħtina l-kuraġġ biex inwieġbu għas-sejħa tiegħek b’qalb kbira u ġeneruża.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Kien għaddej wieħed, Xmun minn Ċireni, missier Xandru u Rufu, ġej lura mir-raba’, u ġagħluh jerfagħlu s-salib.
6. Ġesù jiltaqa mal-Veronika
Mt 24:40
-
Wiċċ Kristu jidher f’ġest ta’ mħabba
-
Fejn nara llum il-wiċċ ta’ Kristu?
Nitolbu: Ġesù, għinna nagħrfuk f’dawk li, għalkemm viċin tagħna, huma l-bogħod mill-qalb tagħna.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
‘Tassew, ngħidilkom, kull ma għamiltu ma’ wieħed mill-iżgħar fost dawn ħuti, għamiltuh miegħi.’
7. Ġesù jaqa’ għat-tieni darba
Lq 14:27
- Mhux faċli ġġorr is-salib
- Mhux faċli timxi wara Ġesù
- Pressjoni minn kull naħa
- Imma min ma jerfgħax salibu ma jistax ikun dixxiplu tiegħu
Nitolbu: Ġesù, mhux faċli terfa’ s-salib. Għinna nkunu responsabbli u nagħrfu li hu biss miegħek li l-piż ikun eħfef.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Min ma jerfax salibu u jimxi warajja ma jistax ikun dixxiplu tiegħi.
8. Jiltaqa’ man-nisa ta’ Ġerusalemm
Lq 23:28
- Jistieden lin-nisa biex jibku ’l dawk li jsofru fid-dinja,
- Dawk li għalihom Ġesù għażel li jmut
- Hu għamel mis-salib is-siġra l-ħadra li tagħti l-ħajja.
Nitolbu: Ġesù, int Dak li toħroġna mill-mewt għall-ħajja. Għinna nkunu persuni li nrawwmu u nagħtu l-ħajja lil dawk li jħossuhom abbandunati jew imwarrba b’xi mod.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
“Nisa ta’ Ġerusalemm, mhux lili ibku, iżda ibku lilkom infuskom u lil uliedkom”
9. Ġesù jaqa’ għat-tielet darba
Ġw 12:24
- Ġesù hu l-ħabba tal-qamħ li taqa’ fl-art u tmut
- Jaqa’ u jqum, imut u jerġa’ lura għall-ħajja
- Miegħu iqajjem lilna wkoll… jekk naħsbu fl-oħrajn u mmutu għalihom
Nitolbu: Ġesù, int il-ħabba tal-qamħ li mietet u li tat ħafna frott. Għinna ‘mmutu’ bħalek biex miegħek nqumu għall-Ħajja.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
“Jekk il-ħabba tal-qamħ ma taqax fl-art u tmut, hi tibqa’ waħedha, imma jekk tmut, tagħmel ħafna frott”
10. Ġesù mneżża’ minn ħwejjġu
Fil 2:6-8
- Ġesù jgħallimna x’jiġifieri tħobb - li tagħti kollox li tagħti ħajtek
- Aħna, minflok bħas-suldati, naraw x’se nakkwistaw
- Imma d-doni li tana Alla huma biex nużawhom għall-oħrajn.
Nitolbu: Ġesù, int ġġib l-għaqda billi tħobb lil kulħadd. Għinna nkunu bħalek: naraw l-bżonn u nfittxu l-interessi tal-proxxmu tagħna.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
hu li għad li kellu n-natura ta’ Alla, ma qagħadx ifittex tiegħu li hu daqs Alla, iżda xejjen lilu nnifsu
billi ħa n-natura ta’ lsir; sar jixbah lill-bnedmin, u deher minn barra bħala bniedem;
ċekken lilu nnifsu, billi obda sal-mewt,
anzi sal-mewt tas-salib.
11. Ġesù msammar fuq is-Salib
Lq 23:33
- Ma kenux l-imsiemer li żammew lil Ġesù mwaħħal mas-salib
- Kienet l-imħabba li biha ntrabat magħna li żammitu hemm
- Min iħobb lest ssofri għal maħbub tiegħu
Nitolbu: Ġesù, agħmel li l-irbit tagħna jkun l-imħabba u mhux il-kilba għall-flus, għall-poter u għall-fama.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Meta waslu fil-post jgħidulu l-Qorriegħa, sallbuhom hemm, lilu u lill-ħatja, wieħed fuq il-lemin tiegħu u l-ieħor fuq ix-xellug.
12. Ġesù jmut fuq is-Salib
Mk 15:37
- Għajta ta’ frustrazzjoni? Ta’ disperazzjoni?
- Le għajta tar-rebħa fuq il-mewt.
- Aħbar tajba - L-imħabba għelbet il-mewt fih… u fina wkoll jekk nissieħbu miegħu.
Nitolbu: Ġesù, int irbaħt fuq il-mewt billi tajt kollox. Ma kien fadal xejn x’teħodlok il-mewt. Agħtina li nissieħbu aħna wkoll mal-ħidma tiegħek biex ikollna sehem mir-rebħa tiegħek.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Ġesù għajjat għajta kbira u radd ruħu.
13. Ġesù mniżżel minn fuq is-salib u mgħoti fi ħdan ommu Ġw. 14:27
- Kollox hu mitmum. Ġesù spiċċa l-missjoni tiegħu.
- Marija, minkejja l-weġgħa li tara l-binha imbiċċer u mejjet hi fil-paċi.
- Fiduċja kbira fil-Missier u l-pjan tiegħu
Nitolbu: Ġesù, agħtina l-paċi tiegħek; paċi li nakkumpanjana fil-ħidma u t-tbatija tagħna għas-Saltna tiegħek tal-imħabba.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
“Jiena nħallilkom is-sliem; nagħtikom is-sliem tiegħi; ma nagħtihulkomx kif tagħtih id-dinja”
14. Ġesù midfun f’qabar ġdid
Mk 14:25
- L-għalqa kienet imħejjija
- Inżgħeret il-Kelma
- Issa fadal biss lis-Stennija
Nitolbu: Ġesù, għinna nemmnu, li kull tmiem mhuwiex ħlief bidu u li l-oqbra huma bibien għal ħajja ġdida. Għax int Alla tal-ħajjin u tal-mejtin.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
Tassew ngħidilkom, li ma nixrobx iżjed mill-frott tad-dielja sa dak in-nhar li nixrob inbid ġdid fis-Saltna ta’ Alla.
15. Ġesù jqum mill-mewt
Mk 16:6-7
- Jgħix għal dejjem
- Magħna għal dejjem
- Aħna ġismu għax tana ġismu.
- L-Ispirtu tiegħu hu r-ruħ ta’ dal-ġisem mistiku tiegħu.
Nitolbu: Ġesù, mqajjem mill-mewt, imla lil qlubna bil-ferħ ta’ l-Għid. Ħalli d-dawl tal-ħajja ġdida tiegħek jiddi minn ġo fina, biex inwasslu lid-dinja, l-aħbar tajba.
Glorja lil Missier…
Nadurawk O Ġesù u nberkuk, għax b’Salibek u l-Mewt tiegħek inti fdejtna.
“Xejn la tinħasdu. Qegħdin tfittxu lil Ġesù ta’ Nazaret li kien imsallab; qam mill-mewt, m’huwiex hawn. Araw il-post fejn kienu qegħduh. Imma morru għidu lid-dixxipli tiegħu, u lil Pietru, li hu sejjer fil-Galilija qabilkom; tarawh hemmhekk, kif kien qalilkom.”